பாவங்கள் கூட்டப்படும்

கடைசியாக
கிராமத்திலிருக்கும் எனக்கும்
கருணை காட்டப்பட்டு
கோட்டு சூட் மாட்டப்பட்டது

இனி
கம்பீரமான என் மீது
கனரக முதல் இலகுரக
வாகனங்கள் வரை
எளிதாய்ச் செல்லும்

சந்தைக்குப் போகும்
சைக்கிள்கள் அப்பாக்களை
சங்கடப்படுத்தாது

பனை உருளை வண்டிகள்
பிஞ்சுப் பாதங்களை
வேகமாய் இழுத்துச் செல்லும்

என்னுள் புதைத்து
சற்று இளைப்பாறிச் செல்லும்
மாடுகளின் குளம்புகளில்
லாடங்கள் அடிக்கப்படும் போது மட்டும்
என் கம்பீரம் மீது
பாவங்கள் கூட்டப்படும்